Saglit

5 MB na kantang ipinapasa via infrared

Pagsuko ng isa sa mga naitalang “Most Wanted”

Takdang oras ng matandang naghihingalo

Ikaw at ang pag-ibig mo

Pag-uwi ng asawa mula sa Dubai

Ebidensyang magsasabi kung peke ba o tunay

Suweldo para mabili ang damit na nakita

Sagot sa tanong na kung babalik ka pa

Pagbayad ng taong matagal nang sinisingil

Pagpula ng ilaw para pansamantalang tumigil

Pagtalab ng gamot na ininom kanina

Baka nakalimutan mong hinihintay kita

Araw ng paglaya mula sa bilangguan

Pinangakong pasalubong na mga laruan

Pagkulo ng sinaing na nakasalang

Sana nga ay naliligaw ka lang

Lahat ng tao ay may hinihintay

At nagbabalak lampasan ang habambuhay

Gaano ba kasi kalayo ang mula rito patungo sa’yo?

Naghihintay kasi ang nakalimutang daan

at ang kinalimutang ako