'Di gaya dati
Kahit sa panaginip
Sumisingit ka parati
Hindi na kita hinahanap
'Di tulad noon
Iba man ang kaharap
Tinatanaw ka pa rin doon
Hindi na kita ipinagdarasal
'Di gaya noong isang linggo
Nainip na marahil sa sobrang tagal
'Di rin naman ikaw ang makakasama ko
Hindi na kita iniiyakan
'Di gaya kahapon
Nakailang baliktad ako ng unan
Para sa isa pang pagkakataon
Hindi na kita hinihintay
'Di gaya noong isang araw
Hindi pa kasi ako sanay
Kaya tinitigan ka nang panakaw
May mahal na kasi akong iba
Hindi ko pa pala nasasabi sa'yo
Pero ng makasalubong kita sa istasyon kanina
Pati 'yung tren,
Iniwan ako.
Inaabangan ka pa rin.
No comments:
Post a Comment